إزاي تكتب سي في بروفشنال!؟

إزاي تكتب سي في بروفشنال!؟

كتابة السي في من أوائل الحاجات اللي بتتعلمها في بداية كاريرك، ماهو عشان تشتغل لازم يكون عندك سي في حلو وبروفشنال عشان تتقبل وتبدأ السلم المهني.

بس للأسف مفيش قانون أو نموذج إجابة لشكل السي في ومعلوماته الصحيحة اللي أي إتش آر هيقراها وهيقبلك، لإنه بيعتمد على عناصر كتير مش بس شكل السي في أو المعلومات اللي فيه.. 

لكن نقدر نقول إن في 6 عناصر أساسية مينفعش متبقاش موجودة جوه السي في بتاعك.. عشان تضمن انه يتقري وكمان تضمن قبولك في أي شركة مناسبة

عناصر لازم تتواجد في السي في

: صفحة واحدة بحد أقصى

حاول تحافظ على طول السي في مش كل حاجة عملتها في حياتك تكتبها لكن اكتب بس اللي ليه علاقة بالشغل اللي مقدم عليه، حاول تخلي السي في كله في صفحة واحدة على الأكثر ومتنقلش للصفحة التانية إلا لو فعلاً في كلام مهم مينفعش ميتكتبش

حط في دماغك نظرة الإتش آر اللي بيقرا السي في، بيفلتر إزاي؟

هو بيقرا مئات السيفيهات كل يوم فلازم بتاعك انت خصوصاُ يبقى مميز عشان يخليك shortlisted وبعدين تتفلتر لمرحلة الانترفيو

فبالتالي كل كلمة تكتبها تبقى بحساب عشان تقول المختصر المفيد في صفحة واحدة بس.. وافتكر إن ما قل ودل أحسن بكتير

: قسّم العناوين بنفس الشكل

لو هتقسم السي في بتاعك من حيث الخبرة والشغل اللي اشتغلته قبل كده وبياناتك فخلي الخط والعناوين معمولة بنفس الشكل بالظبط ومتنوعش فيهم عشان شكل السي في يبقى متناسق ومناسب للي بيقرا إنه يجمع المعلومات عنك بسرعة

:ظبط الهوامش والمسافات

ممكن تبان شئ فرعي لكنها حاجة أساسية في السي في بتاعك، لإنها مسئولة عن الانطباع الأول للشكل العام للسي في، فلو عايز تسيب انطباع كويس من أول نظرة، يبقى خلي بالك من تقسيمة الكلام والهوامش في الصفحة تكون متظبطة، أو ممكن لو مش عارف تظبطها يبقى تنزل cv template وتملاه ببياناتك وبيكون مناسب أكتر من حيث الشكل وتنسيق الصفحة

: اختار خط سهل القراءة

يعني متحاولش تختار خط شكله حلو بس وتحول القراءة لمهمة صعبة، يفضل يكون الخط basic كده مفيهوش أي شغل وابعد عن الخطوط اللي بتلخبط الكلام أو بتصعب قرايته بأي شكل من الأشكال

: اختار حجم خط مناسب

حاول يبقى حجم الخط مناسب للسي في لا يكون صغير أوي ولا كبير أوي، يفضل من 11-12 في الكلام العادي جوه السي في، و14-16 في العناوين الأساسية

: PDF حوّل السي في لـ 

قبل ما تبعت متنساش لو في شكل معين جوه الفايل أو تقسيمة معينة ممكن لما تتبعت تتلخبط وتبوظ، وساعتها هتبان غير منسقة والكلام دخل في بعضه والصفحات مش متقسمة، فالأفضل إنك أول ما تخلصه تحوله لـ PDF وتبعته بالشكل ده عشان تحافظ على هيئته

أهم حاجة في السي في غير التنسيق اللي اتكلمنا عنه، هو المحتوى نفسه، آه التنسيق والشكل وترتيب الكلام مهم جداً، بس لو بتعمل كده من غير ما يكون في كلام حقيقي وخبرة سابقة يوظفوك على أساسها.. للأسف مش هتتقبل

عشان كده متحاولش تكدب في أي معلومة تحطها، تكون محدد جداً وتكتب بأقل عدد كلمات ممكن، وتحاول تظهر خبراتك السابقة بشكل كويس يخليهم يثقوا فيك ويقبلوك، وحتى لو معندكش خبرة كفاية، ممكن تقول مهاراتك والاهتمامات اللي بتحبها اللي هتساعدك تتعلم بسرعة هناك وبالتالي تتقبل برضه عشان عندك قابلية للتعلم السريع